Sa konsèy Jénéral Gwadloup ka chèché voyé douvan adan projé médyatèk-karayib-lasa, sé rivé sanblé, tout dokiman yo pé touvé asi sé péyi Karayib-la, asèlfen rédé moun ki bizwen, tini on zouti pou rivé woukonnèt chak sé péyi-lasa , sav plibyen ola yo yé, rivé chanjé dokiman yonn ba lòt.

Médyatèk Karayib ( Lameca) ka touvé adan on mayaj a plizyè ladmistrasyon, plizyé asosyasyon. Sé on poto-mitan ka sanblé, òwganizé atoupannan i ka wouvoyé ba tousa ka mandé ransèyman é dokiman asi Lakarayib.

A pa té prèmyé fwa moun té ni lidé sanblé tout dokiman a réjyon-la menm koté-la . Mé kou-lasa nou vlé ay pli lwen, nou té ké vlé rivé fè pou koté-lasa ka viv kilti karib-la, on koté ka wousouvwè ki sé travay sé péyi karib-la ka fè, ki sé sé moun-la ka réyalisé sé travay-lasa.

Wousouvè moun, mé an menmditan, ay dèwò pou nou kontré lésèz ka mandé kontré, asèlfen wouzé tout péyi adan onsèl mayaj lèkti pou toutmoun .

Fo sav, Médyatèk Karayib-la, nou vlé-y doubout asi on fondal : Sé péyi karib-la sé onsèl é menm péyi, kanmenmsi yo oprèmyé koulzyé yo pa ka sanm . Pou nou rivé fè-yo fè yonn, sé poté-alé, menné-vini sa chakmoun ni, pou toutmoun séparé sa nou sanblé èvè tout larès moun.

Fo di, tou sé nouvo tèknik a jòdijou la, kontèl Nichtwèl ( Enternèt) kay touvé-yo sé méyè zouti é nou kay sèvi èvè-yo an mitan-mitan projé an nou la.

Gras a Sitwèl : www.lameca.org nou kay pé montré on plibon lyannaj, é fè-vwè, sa nou ni pou nou séparé yonnalòt, é menmjan gadé-vwè sa ka manké-nou é ké fo nou chèché trapé.

Davwa, a pa anni fè-sav sa nou ja ni, mé anmenmditan sanblé dòt nouvo dokiman lèktronik a Péyi Karib .