Médyatèk Karayib jòdi, ja ni on bon valè dokiman an plizyè lang, asi plizyè kalité matéryo, pou rédé moun bòdé tout kalité sijé yo pé rivé bizwen sav. Kèlanswa pasyon a zòt, ki sé istwa, plézi-manjé, litérati e tout bèlté-jolivans, zòt asiré pé sizé, on koté agou a kè a zòt, pou chèché- touvé tousa zòt pé bizwen .

Sé kolèksyon-la, nou ranjé-yo dapré sijé yo ka trété, é moun pé trapé-yo kèlanswa sal-lèkti la yo yé. Dépafwa, nou séré-yo, mé moun ni kita mandé ba-yo, pou nou ay chèché-yo .

Tout dokiman nou ja sanblé ja ka fè pasé 15 000 liv an fwansé, anglé, pannyòl épi kréyòl. Anplis, nou ni apwochan 200 tit a jounal ka palé asi aktiyalité, èspésyalman asi sé péyi Karib-la.

Kanta pou Zòn-Péyi, nou ni dokiman pout tout sijé, pou tout nivo, silon jan moun pé bizwen bòdé sé péyi-karib-la. Moun ki bizwen ay fè on lantou adan sé péyi-lasa kay pé touvé tout gid pou touris évè tout ransèyman.

Fo moun ki enmé mizik, moun ka jwé mizik-batri , obenswa amatè, fo yo sav kotésit sé sèl koté ou pé rivé touvé toutjan diks-konpak pou kouté. Tini toutjan, mé tini èspésyal mizik péyi karib.

Mé a pa tout, èspésyalman, nou ka chèché fè sa ponmoun kotésit pa ka fè : nou ka sanblé, nou ka rédé mété dèwò liv ba lajennès an Péyi-Karib. Anplis, fo moun sav, a pa yenki èvè liv moun pé sèvi koté-nou, nou ka rédé-yo chèché-touvé tout ransèyman yo pé bizwen. Pou sa, nou ka ba-yo zouti lis adan toujanmédya, èvè on sélèksyon asi sitwèl an-nou :www.lameca.org .