Batiman otila Médyatèk Karayib-la yé la, ka touvé-y toupré Lisé Gerville Réache, pa lwen Légliz Carmel é pa sitèlman lwen Fò Dèlgrès ; kivédi an plen-mitan ola vil-Bastè, prèmyé vil gwadloup, vwè jou .

Asi konstriksyònman a batiman-lawmé lasa, ou ja ka vwè poukisa Charles Houel de Petit-Pré pasi 1650, té konswa tout kawtyé Karmèl-la .

Okomansman té ni prèmyé légliz a sé Pè-la yo té ka kriyé : " Pères des Carmes ". Légliz-lasa touvé krazé pasi 1759 kifè asi lanplasman a-y yo konstrui batiman-lasa té ka touvé " Magasin du roy " . Asi granliv dokiman a tout batiman-lawmé yo mété dèwò an 1889, ou ka vwè-y parèt pou prèmyé fwa èvè liméwo 13 . I ni on fòrm èspésyal ka sanm on fè a chouval kifè pa ni mwayen pa woukonnèt-li .

An tan-lasa i té ka sèvi " Magasin général ", sé la yo té ka mété boulfè- kannon atoupannan té ni amenmtan biro finans é pwovizyonnman .

Sé menm koté-las yo mété an 1891 Enprimri a Gouvèlman yo kriyé an 1930 " Imprimerie officielle ". Sé la tout lak-lamistrasyon, tout règlèman a koloni Gwadloup té ka enprimé jis an 1969.

Lèwgadé adan tousa, batiman té ja konmansé dégrenné bon dégrenné-la. Kanmensa yo fè-y sèvi pou kèk tan ankò biro a la DASS épi anmenmditan ta Lapòs.

An 1995 Konsèy Jénéral désidé, poubon, fo té sové moniman-lasa .

Sé Jean-Claude Pancrassin on architèk, ki san dérèspèté batiman-la é lanviwonnaj a-y ki wou nèfté-y.

Kifè, dépi 1997, sé la Médyatèk Karayib-la ka touvé-y. On koté ola moun ka travay pou Médyatèk-la menmjan ki moun ka vin la pou li, obenswa pou chèché, toutmoun ka touvé sé on koté plézab pou woulé. Yo ba Médyatèk Karayib-la non a misyé Bettino Lara poudavwa sé-y dènyé dirèktè a Enprimri ofisyèl-la ki dirijé-y.